Rev 15 | AOM | STEP | Ëhi'amu gavodeje noehu bogo gavaruëhi jië'e mu börömo böröme ö'idöre jiamu. Ja'o ga'ibejane tiö'ibejane. Ëhesi bëhoho anerae aho'obëhe 7 jaburo a bövi bise'o ijumo'amo'iröhe inömo sisëho ujuoho ruehijo. Ëinömo sisëho rue'iramu ëhuro God dë vörönimobe rovadoho barë'ë'e. Ëhuni ë inömo sisëho ijo tugoho'i a bövi bise'o ijumo'amo'iröhe inömoho jiohijo.

Revelation of John 15

Ijo tugoho'i majare God-are i'u sa'a rajo bojëmi'iröhëro anerae 7 jabuhu rama ujuohare jöhoje.

1 Ëhi'amu gavodeje noehu bogo gavaruëhi jië'e mu börömo böröme ö'idöre jiamu. Ja'o ga'ibejane tiö'ibejane. Ëhesi bëhoho anerae aho'obëhe 7 jaburo a bövi bise'o ijumo'amo'iröhe inömo sisëho ujuoho ruehijo. Ëinömo sisëho rue'iramu ëhuro God dë vörönimobe rovadoho barë'ë'e. Ëhuni ë inömo sisëho ijo tugoho'i a bövi bise'o ijumo'amo'iröhe inömoho jiohijo.

2 Ëhi jio'i röhu gavodeje jovo e'u deri va'ëne börömo böröme jiamu. Ëe'u va'ënire vënëro ravanovoromo kavuohijo. O ë e'u va'ëne hesi riröre ae riravohijo. Urimoho ë ariböviohuro biririvoromo mi sisëhu'o hesi nu ano'o va'ëne inömohu'o ëho jabesi muoho jöho bogo ejëhoromo mi sisë hesi ihoho sinoroho bogo bae'i ruahö'öjareje. Ëariböviohuro God-hu i'imëmade gitaho ujuohë'e e'u va'ëne ë hesi riröre riravohijo. 3 Gitaho ujuohë'e riravoromo God-are mu vaejahaje ae Moses-are jöho ioromo God-are Sheep Harihu hesi jöhu'o ioromo uvoruomohijo:

Bada God ja daruge aho'o baejë'e ae javajëjo.
Jasi muoho masije ma-mabëhe höjo.
Ja böröme namiromo sa'ae aho'o muebejavuanue ae javajëjo.
Jasi muoho bogo sareri'ehu jio'i ma-maemu jio'amajëjo.
4 Bada raro ja bogo böröme hö uehorovo'ajëjo.
Raro jasi ihoho bogo döroho bamo'ajëjo.
Ja gemu ma-maemu javajëjo.
Sa'ae aho'obëhe rueromo jasi örire rajahiruomo'ajëjo
jasi mu ma va'orahoro jio'amajohuni.
5 Ëhi'amu gavodeje ö'idöre God-hu jiajire niögu javu maho jiovë'e jiamu. 6 Jiovë'e jiamu gagorovo naehu avevejö'e uëvode aneraho 7 ë osare jië'ëro ma-mabëhe ajivë'e sanu'e niögoho io'amë'e vinebire gold-ëro muoho taemo'amë'e suorovoromo ruehijo. 7 Rue'ego God rajahijarue maje 4-ho röhu gemuëro anerae 7 jabesi örire gold'e hevöho 7 ëhi anerae gemu gemu bojëmibe va'ohijo. Ëhevö gagoho God-hu a i'u bojëmi'iröhe vöröhuro irijiomo'amë'e jiohijo God ioro'ioremu hijaje a hesi vöröhuro. 8 Röhu God-are ajohu'o darugohu'o ë hesi u'ohuro God-are osa mare u'ivoromo rumorovohijo. Ae gö ë God-are osa maroho bogo rumo va'o varijënoho jiohijo. Hujeji anerae 7-ho jaburo a bövi bise'o ijumo'amo'iröhe mue 7-ho vae barë'iramu evare va'oruomo'ë'e.